ភ្នំពេញ៖ សមាជិកគណៈកម្មាធិការកណ្ដាលគណបក្សប្រជាជនកម្ពុជាលោក ឯម ច័ន្ទមករា បានផ្ញើសារចូលរួមគោរពអបអរសាទរយ៉ាងកក់ក្តៅបំផុតជូនចំពោះសម្ដេចធិបតី ហ៊ុន ម៉ាណែត ដែលត្រូវបានអង្គសន្និបាតគណៈកម្មាធិការកណ្ដាល លើកទី៤៤ អាណត្តិទី៤ នៃគណបក្សប្រជាជនកម្ពុជាបោះឆ្នោតផ្ដល់សេចក្ដីទុកចិត្តជ្រើសតាំងជាអនុប្រធានគណបក្ស។

លោក ឯម ច័ន្ទមករា លើកឡើងថាការ បោះឆ្នោតជ្រើសតាំងសម្ដេចធិបតីជាអនុប្រធានបក្សគឺពិតជាស័ក្តិសម ព្រោះសម្តេចធិបតីបានលះបង់កម្លាំងកាយ កម្លាំងចិត្ត ស្មោះស្ម័គ្រ ហ៊ានធ្វើពលិកម្មដើម្បីបុព្វហេតុដើម្បីគណបក្ស បម្រើផលប្រយោជន៍ជាតិ និងប្រជាជន។

លោក ឯម ច័ន្ទមករា បន្ថែមថាតាមរយៈទស្សនៈ គោលជំហរ ភាពជាអ្នកដឹកនាំល្អ និងប្រជាប្រិយភាពរបស់សម្ដេចធិបតីពិតជាអាចចូលរួមដឹកនាំគណបក្សប្រជាជនឲ្យកាន់តែខ្លាំងក្លា និងរឹងមាំបន្ថែមទៀតផងដែរ។

គួរឲ្យដឹងថាសម្ដេចធិបតី ហ៊ុន ម៉ាណែត ត្រូវបានសមាជិកនៃអង្គសន្និបាតគណៈកម្មាធិការកណ្ដាលលើកទី៤៤ អាណត្តិទី៥ របស់គណបក្សប្រជាជនកម្ពុជាបោះឆ្នោតជ្រើសតាំងបន្ថែមជាអនុប្រធាន នៅថ្ងៃទី១០ ខែធ្នូ ឆ្នាំ២០២៣នេះ៕